Боздиди кории Раиси вилоят Раҷаббой Аҳмадзода аз ноҳияи Бобоҷон Ғафуров

30 сентябр Раиси вилояти Суғд Раҷаббой Аҳмадзода дар ноҳияи Бобоҷон Ғафуров бо ҷараёни корҳои ободонию созандагӣ шинос гардид.

Раиси вилоят нахуст сохтмони корхонаи истеҳсоли хӯроки омехтаи паранда ва чорвои Ҷамъияти дорои масъулияти маҳдуди «Хубҷамъ-инвест»  - ро мавриди таваҷҷуҳ қарор дод. Корхонаи истеҳсоли маҳсулоти хӯроки омехтаи паранда ва чорво бо харҷи 50 миллион сомонӣ сохта шуда, метавонад дар як соат 20 тонна маҳсулот истеҳсол созад. Бо ба кор шурӯъ намудани корхона 40 нафар шаҳрвандон бо ҷойи кор доимӣ таъмин мегарданд. Тавре иттилоъ дода шуд, то имрӯз 90%-и корҳо ба анҷом расонида шудааст.

Раиси вилоят ба наздикони Сорбон Худойбердизода изҳори ҳамдардӣ намуд

Дар доираи сафари корӣ ба ноҳияи Деваштич Раиси вилояти Суғд Раҷаббой Аҳмадзода ба хонадони оилаи Худойбердиевҳо рафта, ба аҳли оилаи афсар Сорбон Худойбердизода изҳори ҳамдардӣ баён намуд.

Сорбон Худойбердизода зодаи деҳаи Хишекати ноҳия буда, пас аз хатми Донишгоҳи олии ҳарбии Тоҷикистон дар Исфара кору фаъолият дошт. Мавсуф дар муноқишаҳои ахири марзӣ барои ҳимояи марзу буми Ватани азизамон қаҳрамонона шаҳид гардид.

Дар деҳаи Ҳазорчашмаи ноҳияи Деваштич маркази қолинбофӣ бунёд мегардад

29 сентябр Раиси вилояти Суғд Раҷаббой Аҳмадзода дар деҳаи Ҳазорчашмаи Ҷамоати деҳоти Муҷуни ноҳияи Деваштич ба бунёди маркази қолинбофӣ асос гузошт.

Чуноне иттилоъ дода шуд, ҷиҳати иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти эҳё намудани ҳунарҳои мардумӣ ва ба ин васила дар маҳалҳо бо ҷойи корӣ таъмин намудани занону духтарони хонашин бо иқдоми соҳибкори маҳаллӣ Сатторқулов Пиримқул маркази қолинбофӣ бунёд карда мешавад. Тибқи лоиҳа барои анҷоми корҳо 400 ҳазор сомонӣ сарф шуда, 8 нафар бо ҷойи кории доимӣ таъмин мегарданд.

Шиносоӣ бо сохтмони иншооти ҷашнӣ дар ноҳияи Деваштич

Раиси вилояти Суғд Раҷаббой Аҳмадзода рӯзи 29 сентябр дар деҳаи Ҳазорчашмаи Ҷамоати деҳоти Муҷуни ноҳияи Деваштич рафти сохтмону муҷаҳҳазгардонии  муассисаи таҳсилоти миёнаи умумии рақами 5-ро мавриди таваҷҷуҳ қарор дод. Бинои нави таълимӣ бо дастгирии Ҳукумати Ҷумҳурии Тоҷикистон ва бо харҷи 1,4 миллион доллари ИМА сохта шуда, барои 620 хонанда дар як баст пешбинӣ гардидааст. Иншооти муҳташами замонавӣ аз 4 ошёна иборат буда, дорои 29 синфхона, 5 утоқи корӣ, лаборатория, толори хониш, китобхона,  ошхона, маҷлисгоҳ, толори калони варзишӣ ва дигар иншооти зарурӣ мебошад.

Дар муассисаи таҳсилоти миёнаи умумии рақами 5 , ки солҳои 50-уми асри гузашта бунёд гардидааст, 64 нафар омӯзгор ба таълиму тарбияи насли наврас машғул буда, бо сохта шудани бинои нав хонандагон дар беҳтарин шароит таълим мегиранд.

Дар деҳаи Ҳазорчашмаи ноҳияи Деваштич мумфаршкунии 3 км роҳ оғоз шуд

Ба истиқболи 30-солагии Иҷлосияи 16-уми Шӯрои Олии Ҷумҳурии Тоҷикистон ва 35-солагии Истиқлоли давлатии Ҷумҳурии Тоҷикистон дар тамоми минтақаҳои вилояти Суғд корҳои ободонию созандагӣ ҷараён дорад.

Дар ноҳияи Деваштич низ бо талошу заҳматҳои сокинон бунёдкорӣ вусъати тоза пайдо карда, шаҳрвандон барои ободии диёр саҳм гузошта истодаанд. Аз ҷумла, сокинони деҳаи Ҳазорчашмаи ноҳия бо иҷрои корҳои ободонӣ тасмим доранд, ки ҷашнҳои милливу давлатиро дар сатҳи баланд истиқбол намоянд. Сокинон имрӯзҳо ба таври оммавӣ кӯчаву маконҳои умумиро тозаву озода намуда, барои ободонии маҳалли зист аҳлона меҳнат менамоянд.

Боздиди Раиси вилоят Раҷаббой Аҳмадзода аз ҷараёни корҳои барқарорсозӣ дар Исфара

Имрӯз Раиси вилояти Суғд Раҷаббой Аҳмадзода дар шаҳри Исфара қарор дошт ва ҷараёни корҳои бартарафсозии оқибатҳои муноқишаҳои наздисарҳадиро мавриди таваҷҷуҳ қарор дод.

Дар шаҳри Исфара айни замон Ситоди вилоятӣ оид ба бартарафсозии оқибатҳои муноқишаҳои наздисарҳадӣ фаъолият дошта, тақсимоти масолеҳи сохтмонӣ ба сокинони зарардида, бартарафкунии оқибатҳои даргириҳо, таъмини аҳолӣ бо маводи ғизоӣ таҳти таваҷҷуҳи хоса қарор дорад.