Хабарҳо
Дар ноҳияи Ҷаббор Расулов бунёди боғҳои нав оғоз ёфт - 23.01.2022 14:36
Боздиди кории Раиси вилоят Раҷаббой Аҳмадзода аз шаҳри Гулистон - 23.01.2022 14:13
Шиносоии Раиси вилоят бо сохтмони корхонаҳои саноатӣ дар шаҳри Бӯстон - 22.01.2022 14:17
Қадршиносии ғолибони озмуни "Беҳтарин муассисаи таҳсилоти иловагии вилояти Суғд дар соли 2021" - 21.01.2022 11:45
Маҷлиси васеи Ҳукумати Ҷумҳурии Тоҷикистон баргузор гардид - 20.01.2022 21:21
Дар Истаравшан теъдоди стипендияҳои раиси шаҳрро зиёд карданд - 20.01.2022 17:04
ҶАМЪБАСТИ ФАЪОЛИЯТ ВА БАРРАСИИ ДУРНАМОИ НАВ - 20.01.2022 17:02
COVID-19. Ба Тоҷикистон беш аз як миллион воя воксина бар зидди коронавирус ворид гардид - 18.01.2022 14:17
Толибилмони Литсей барои хонандагони болаёқат дар шаҳри Хуҷанд аз ИМА 6 медали нуқраву биринҷӣ оварданд - 18.01.2022 09:15
Баргузории семинари машваратӣ – дастурдиҳии вилоятӣ дар Раёсати маорифи вилоят - 17.01.2022 14:10

Навиди Суғд


Қадршиносии ғолибони озмуни "Беҳтарин муассисаи таҳсилоти иловагии вилояти Суғд дар соли 2021"

( 0 Овоз )

Дар озмоишгоҳи иноватсионии Маркази таҳсилоти иловагии вилояти Суғд дар доираи ҷаласаи ҷамъбастии фаъолияти Маркази таҳсилоти иловагии вилояти Суғд дар соли 2021 ва вазифаҳо барои соли 2022 аз озмуни "Беҳтарин муассисаи таҳсилоти иловагии вилояти Суғд дар соли 2021" натиҷагирӣ карда шуд.

Озмуни "Беҳтарин муассисаи таҳсилоти иловагии вилояти Суғд" таи ду сол аст,ки бо ибтикори Маркази таҳсилоти иловагии вилояти Суғд байни 27 муассисаҳои таҳсилоти иловагии шаҳру ноҳияҳои вилояти Суғд ташкил ва баргузор мегардад. Ҳадафи асоси озмун ин беҳбудбахшии фаъолият, қадршиносии роҳбарони фаъол, паҳн кардани таҷрибаи пешқадам ва дуруст ба роҳ мондани фаъолияти корӣ буда, дар раванди ҷамъбасти озмун ба дурустии ҳуҷҷатгузориҳои муассисаҳо, иҷроиши саҳеҳи барномаҳои давлатӣ, фаъолияти хуби корӣ, қобилияти навоварӣ, таҳияи дастурҳои методӣ, корҳои ободониву созандагӣ ва иштироки фаъолона дар озмунҳои байналмиллалӣ, ҷумҳуриявӣ, вилоятӣ эътибор дода шуда, дар асоси он баҳогузорӣ  карда мешавад.

Озмун ҳамасола дар асоси Низомномаи озмун, ки тибқи фармоиши директори Маркази таҳсилоти иловагии вилояти Суғд тасдиқ гардидааст, ташкил ва баргузор мегардад. Ҳангоми ҷамъбасти озмун фаъолияти кории ҳар муассиса дар давоми сол ба инобат гирифта мешавад. Озмуни имсола, ки ба ҷашни бузурги миллиаамон 30 -солагии Истиқлолияти давлатии Ҷумҳурии Тоҷикистон бахшида шуда буд, бисёр дар сатҳи баланд ташкил ва баргузор гардид.

Дар натиҷаи ҷамъбасти озмун бо ба даст овардани 95 хол дар байни 27 муассисаҳои таҳсилоти иловагӣ Муассисаи давлатии Маркази таҳсилоти иловагии рақами яки шаҳри Панҷакент ғолиби мутлақ ва соҳиби Шоҳҷоизаи озмун гардид. Ҳамчунин Муассисаи давлатии Маркази тахсилоти иловагии ноҳияи Ашт бо ба даст овардани 93 хол мақоми аввал, Марказҳои таҳсилоти иловагии ноҳияҳои Ҷаббор Расулов ва Спитамен бо ба даст овардани 90 хол мақоми дуввум, Муассисаҳои таҳсилоти иловагии шаҳрҳои Истаравшан, Конибодом ва ноҳияи Деваштич бо ба даст овардани 88 хол мақоми саввумро касб намуданд. Инчунин Марказҳои таҳсилоти иловагии шаҳрҳои Бӯстон, Гулистон ва Исфара ба даҳгонаи бехтарин муассисаҳои тахсилоти иловагии шаҳру ноҳияҳои вилояти Суғд шомил гардида, бо Сипосномаи Маркази таҳсилоти иловагии вилояти Суғд сарфароз гардонида шуданд. Лозим ба такид аст, ки барандаи Шоҳҷоизаи озмун бо Ҷом, лента рамзӣ, Парчами рамзӣ, Диплом ва тӯҳфаи хотиравӣ, ғолибони ҷойҳои 1,2,3 бо Диплом, лента рамзӣ ва тӯҳфаи хотиравӣ аз ҷониби Раёсати маорифи вилояти Суғд ва Маркази таҳсилоти иловагии вилояти Суғд қадршиносӣ карда шуданд.

Ҳамзамон дар поёни ҷаласа ба собиқадори соҳа, собиқ директори Маркази таҳсилоти иловагии вилояти Суғд Муҳиддинхон Қосимов, ки ба синни мубораки 60 солагӣ расиданд унвони "Устоди фахрӣ" ва Ифтихорномаи Маркази ҷумҳуриявии муасисаҳои таҳсилоти иловагӣ супорида шуд.

Хадамоти матбуоти
Раиси вилояти Суғд

Дар Истаравшан теъдоди стипендияҳои раиси шаҳрро зиёд карданд

( 0 Овоз )

Таваҷҷуҳ ба фаъолияти ҷавонон ва татбиқи муваффақонаи сиёсати давлатии ҷавонон имрўз яке аз муҳимтарин самтҳои сиёсати пешгирифтаи Ҳукумати мамлакат маҳсуб ёфта, ба фаъолияти ҷавонон дар ҳудуди кишвар эътибори бештар зоҳир карда мешавад ва иқтидору имкониятҳои онҳо барои пешрафти самтҳои идоракунии давлатӣ босамар истифода мегардад.

Дар ин замина, дар доираи иҷрои саривақтии дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки зимни ироаи Паёми навбатӣ баён доштанд, дар шаҳри Истаравшан тадбирҳои судманд андешида шуда, дар пайравӣ ба иқдоми Сарвари давлат дар самти иҷтимоиёт, яъне баланд бардоштани стипендияҳо, бо қарори раиси шаҳри Истаравшан аз 14 январи соли 2022 ҳаҷми стипендияи раиси шаҳр барои хонандагони болаёқат ба 1000 (ҳазор) сомонӣ расонида шуда, теъдоди стипендия аз 50 ба 65 адад расонида шуд.

Тибқи Низомнома 15 стипендияи нав ба хонандагони Литсейи касбӣ-техникии шаҳр (5 адад), Коллеҷи ҳунарҳои мардумӣ (5 адад) ва Коллеҷи тиббии шаҳр (5 адад) пешбинӣ карда шудааст.

Бояд тазаккур дод, ки дар соли хониши 2021 шумораи гирандагони стипендияи раиси шаҳр аз 20 нафар ба 50 нафар расонида шуда, маблағи солонаи гирандагони стипендия ба 900 сомонӣ, дар умум 45 000 сомонӣ барои 50 нафар муқаррар гардида буд.

Хадамоти матбуоти
Раиси вилояти Суғд

ҶАМЪБАСТИ ФАЪОЛИЯТ ВА БАРРАСИИ ДУРНАМОИ НАВ

( 0 Овоз )

Дар маҷлисгоҳи Шўрои иттифоқҳои касабаи вилоят Пленуми васеи Шўрои иттифоқҳои касабаи вилояти Суғд баргузор гардид, ки дар он ду масъала дар бораи Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон ва ҷамъбасти фаъолияти кори Шўрои иттифоқҳои касабаи вилояти Суғд дар соли 2021 ва вазифаҳо барои соли 2022 мавриди баррасӣ қарор гирифт.

Аз рўи масъалаи якум раиси Шўрои иттифоқҳои касабаи вилояти Суғд Шарифулло Абдуллозода сухан ронда, қайд намуд, ки дар Паёми навбатии Президенти кишвар муҳтарам Эмомалӣ Раҳмон ба Маҷлиси Олии Ҷумҳурии Тоҷикистон самтҳои асосии сиёсати иқтисодию иҷтимоии давлату Ҳукумат ва муносибатҳои хориҷии мамлакат муфассал баён гардид, ки он фарогири тамоми масъалаҳои муҳими имрўзаи кишвар аст.

Воқеан, аз ҷониби Асосгузори сулҳу ваҳдати миллӣ–Пешвои миллат муҳтарам Эмомалӣ Раҳмон таъкид гардид, ки дар ҳаллу фасли тамоми муаммоҳои мавҷуда мо бояд ба нерўи зеҳнию ақлонии мардуми шарифи Тоҷикистон, фарзандони баору номуси он такя намоем ва аз таҳаввулоту ҳодисаҳое, ки дар як қатор мамлакатҳои ҷаҳон ба амал омада истодаанд, барои худ хулосаҳои дурустро бароварда, ҷиҳати пойдории ваҳдати миллӣ ва эҳёи Тоҷикистон тадбирҳои иловагиро андешем. Шарифулло Абдуллозода таъкид дошт, ки Паёми навбатии Пешвои миллат раҳнамо барои фаъолияти минбаъдаи ҳамаи аъзои иттифоқи касаба маҳсуб меёбад. Мавзўъ ва муҳтавои Паёми Пешвои миллат аслан фарогири тамоми соҳоти хоҷагии халқи кишвар буда, тамоми кормандонро даъват месозад, ки дар кори худ сермаҳсул бошанд ва аз рўи нишондоди он амал намуда, бо дасту дили гарм меҳнат намоянд. Ҳамчунин, паҳлўҳои гуногуни фаъолияти иттифоқи касабаи вилоятро дар соли 2021 таҳлил намуд ва дар бораи вазифаҳои кормандон, фаъолон ва кулли аъзои иттифоқи касаба дар соли 2022 ҳарф зад.

Сипас Обидзода Нуъмон Юлдошӣ – муовини аввали раиси Шӯрои иттифоқҳои касабаи вилоят оид ба ҷамъбасти фаъолияти Шӯрои иттифоқҳои касабаи вилояти Суғд барои соли 2021 маърӯза намуда, дар мавриди дастовардҳо ва натиҷаҳои назарраси фаъолият иттило дод. Дар мавриди камбудиҳои ҷойдошта дар кумитаҳои вилоятии соҳавӣ оид ба таъмини ҳифзи ҳуқуқи меҳнат, афзудани қарзи музди маоши кормандон дар ташкилоти ибтидоӣ сухан ронд.

Файзизода Исмоил Нарзӣ– муовини аввали раиси Федератсияи ит тифо қ ҳ ои касабаи мустақили Тоҷикистон низ дар бораи Паёми навбатии Пешвои миллат муҳтарам Эмомалӣ Раҳмон ҳарф зада, ёдрас шуд, ки дар ҳақиқат, имрўзҳо ҳамаи мо шоҳиди онем, ки тўли солҳои охир дар тамоми самтҳои зиндагии мардуми кишвар тағйироти мусбат ба амал омада истодааст ва туфайли соҳибистиқлолии мамлакат, ба арзишҳои миллию динӣ ва хештаншиносии мардум арҷгузорӣ карда мешавад. Ҳамчунин дар барои иҷрои нақшаи чорабиниҳои вохӯрии Асосгузори сулҳу ваҳдати миллӣ - Пешвои миллат Президенти Ҷумҳурии Тоҷикистон муҳтарам Эмомалӣ Раҳмон бо фаъолони Федератсияи иттифоқҳои касабаи мустақили Тоҷикистон аз 24- уми октябри соли 2019 суханронӣ карда, ба фаъолияти иттифоқҳои касабаи вилоят баҳои баланд дод.

Баъдан раисони кумитаи иттифоқи касабаи кормандони соҳаи бофандагӣ ва саноати сабуки вилоят Раъно Қаландарова ва кумитаи иттифоқи касабаи коркунони сохтмон ва саноати масолеҳи бинокории вилоят Расул Раҳимов ҳисобот доданд. Собиқадори Шўрои иттифоқҳои касабаи вилоят, раиси собиқадорони Ҳизби Халқии Демократии Тоҷикистон Саидбой Зокиров ба фаъолияти Шўро баҳои баланд дода, баҳри боз ҳам баланд намудани фаъолияти соҳа маслиҳатҳои судманд доданд.

Баъди муҳокимаи масъалаҳои асосӣ Пленум аз рўи он қарорҳои дахлдор қабул намуда, ҳамчунин ба 15 нафар фаъоли ташкилоти ибтидоии иттифоқи касаба дар вазъиятӣ тантанавӣ шаҳодатномаи Лавҳаи фахрӣ супорида шуд. Инчунин ғолибони “Беҳтарин ташкилоти ибтидоии иттифоқи касаба” ва “Беҳтарин Шӯрои ҳамоҳангсозии иттифоқи касаба” барои соли 2021 бо диплом ва мукофоти пулӣ қадрдонӣ шуданд.


COVID-19. Ба Тоҷикистон беш аз як миллион воя воксина бар зидди коронавирус ворид гардид

( 0 Овоз )

Дар чаҳорчӯби барномаи COVAX аз ширкати амрикоии «Moderna» ба Тоҷикистон миқдори зиёди ваксина ворид карда шуд. Тавре аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» хабар доданд, 17 январ зиёда аз 1 миллион вояи дору дастрас гардид. Гуфта мешавад, ки ин нахустин воридоти ваксина бар зидди COVID-19 дар соли равон ба Тоҷикистон мебошад.

Ёдовар мешавем, ки бо қарори Ситоди ҷумҳуриявӣ оид ба пурзўр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID-19 аз 3 июли соли гузашта дар Тоҷикистон эмгузаронӣ бар зидди коронавирус барои шаҳрвандони аз 18-сола боло ҳатмӣ гардид.

Тибқи иттилои Вазорати тандурустӣ ва ҳифзи иҷтимоии аҳолӣ, дар чаҳорчӯби механизми глобалии COVAX ва ҳамчун кумаки башардӯстона ба Тоҷикистон беш аз 9 миллион воя воксина бар зидди коронавирус ворид шудааст.

Дар кишвар бар зидди коронавирус бо ваксинаҳои «Sputnik V», «AstraZeneca», «CoronaVac», «Moderna» ва «Pfizer» эм мекунанд.

Мувофиқи маълумоти охирин, дар ҷумҳурӣ 68,6 фоизи аҳолии аз 18-сола боло вояи якуми ваксина ва 57 фоиз вояи дуюмро гирифтаанд.

Шумораи умумии гирифторони COVID-19 дар кишвар 17,95 ҳазор нафарро ташкил медиҳад. Тибқи иттилои расмӣ, аз оғози пандемия дар кишвар 124 нафар фавтидаанд.

Қаблан мақомоти Тоҷикистон дар бораи реваксинатсия (ваксинагузаронии такрорӣ) бар зидди COVID-19 миёни аҳолӣ хабар дода буданд.

Ҳамин тавр, аввалин нафароне, ки вояи сеюми ваксинаро мегиранд, табибон, баъдан омӯзгорон, хизматчиёни давлатӣ ва табақаҳои осебпазири аҳолӣ мебошанд.

 

Толибилмони Литсей барои хонандагони болаёқат дар шаҳри Хуҷанд аз ИМА 6 медали нуқраву биринҷӣ оварданд

( 0 Овоз )

Шаш нафар толибилмони Литсей барои хонандагони болаёқат дар шаҳри Хуҷанд дар олимпиадаи байналмилалии фаннӣ - “COPERNICUS”, ки дар шаҳри Хюстони иёлоти Техаси ИМА доир шуд, ширкат варзида, соҳиби медал гардиданд.

Ин олимпиада рӯзҳои 8-16 январи соли 2022 дар осорхонаи илмӣ ва фановарии шаҳри Хюстон баргузор шуда, аз 50 кишвари олам беш аз 2000 нафар аз рӯи фанҳои табиатшиносӣ, физика ва астрономия барои ба даст овардани ҷойҳои ифтихорӣ талош карданд.

Дар қатори намояндагони кишварҳои пешрафтаи ҷаҳон, аз ҷумла Фаронса, Итолиё, Амрико, Бразилия, Чин, Федератсияи Русия, Аргентина, Канада, Ҳиндустон, Британияи Кабир, Австралия, Кореяи Ҷанубӣ, Ҷопон ва ғайра хонандагон аз кишвари Тоҷикистон аввалин маротиба дар ин озмуни сатҳи ҷаҳонӣ иштирок намуданд.

Бо саъйу кӯшишҳои директори Литсей барои хонандагони болаёкат дар шахри Хучанд Сурайё Негматова 5 январ шаш нафар хонандагони литсей ба кишвари Амрико сафарбар карда шуда, дар олимпиадаи мазкур  иштирок намуда, ҷойҳои ифтихориро касб намуданд.

Аз ҷумла, Фаррухи Шералӣ – хонандаи синфи 8 аз фанни табиатшиносӣ соҳиби ҷойи дуюм,  Абдуллозода Амир – хонандаи синфи 9 аз фанни физика соҳибии ҷойи сеюм, Абдуллоева Меҳрангез – хонандаи синфи 11 аз фанни физика ва астрономия соҳиби ҷойи сеюм, Ботурхоҷаев Ардашерхоҷа – хонандаи синфи 11 аз фанни физика ва астрономия соҳиби ҷойи сеюм,  Муқумов Шараф – хонандаи синфи 8 аз фанни табиатшиносӣ соҳиби ҷойи сеюм, Мамуров Акрамхоҷа – хонандаи синфи 8 аз фанни табиатшиносӣ соҳиби ҷойи сеюм гардиданд.

Инчунин, хонандагони литсей тариқи даставӣ дар озмуни даставӣ аз фанни физика фаъолона иштирок намуда, Ҷоми озмунро ба даст оварда, ғолиби мутлақи даставӣ аз фанни физика гардиданд. Дар натиҷа хонандагони литсей як медали нуқра, панҷ медали биринҷӣ ва Ҷоми даставиро аз фанни физика ба даст оварданд.

Хадамоти матбуоти
Раиси вилояти Суғд

ШУМО ДАР: Навиди Суғд